Monthly Archives: August 2017

ហ៊ុន សែន ប្រកាសឱសានវាទ ៦ថ្ងៃទៀតឲ្យ ឡាវ ដកកងទ័ព ចេញពីទឹកដីខ្មែរ ក្នុងតំបន់ជម្លោះ ខេត្តស្ទឹងត្រែង

hun-sen-lao-prime-minister

{តើលោកហ៊ុន សែន ប្រើស្នៀតរឿងឡាវ ឈ្លានពានទឹកដីកម្ពុជា ដើម្បីរកសម្លេងឆ្នោតឆ្នាំក្រោយ​ ឬយ៉ាងណា? នោះគឺជាក្រឡាអុករបស់លោក ហ៊ុន សែន ហើយ ដោយយករឿងជម្លោះព្រំដែន ជាមួយឡាវ តាមយុទ្ធសាស្រ្ត ប្រទេសវៀតណាម ខ្ចីដៃឡាវ ជួយឲ្យលោក ហ៊ុន រកប្រជាប្រិយភាពខាងនយោបាយឡើងវិញ ។ បញ្ហានេះ តោងពលរដ្ឋខ្មែរ ស្វែងយល់ឲ្យបានស៊ីជម្រៅ និងវាយតម្លៃឲ្យបានត្រឹមត្រូវ។ -ដោយ ម៉ែន ណាត}


ហ៊ុន សែន ព្រមានពីសង្គ្រាម បើ ឡាវ មិនដកកងទ័ព ចេញពីទឹកដីខ្មែរ ក្នុងតំបន់ជម្លោះ ខេត្តស្ទឹងត្រែង

(ដោយ លោក ញឹម សុខន​​ , VOD News, 11-8-2017)
នាយករដ្ឋមន្ត្រីកម្ពុជា លោក ហ៊ុន សែន បានប្រកាសឲ្យរដ្ឋាភិបាលឡាវ ត្រូវដកកងទ័ពរបស់ខ្លួន ចេញ​ពីខេត្តស្ទឹ​ងត្រែ​ង ​ជា​​បន្ទាន់ ត្រឹម ៦ ថ្ងៃទៀត ដោយព្រមានថា ប្រយ័ត្នកម្ពុជា អស់ភាពអត់ធ្មត់។

ក្នុងពិ​​ធីប្រកាសនិងផ្ទេរតំណែង ប្រធានរាជ្យបណ្ឌិត្យសភាកម្ពុជា នាថ្ងៃទី១១ ខែសីហា ២០១៧ នេះ លោកនា​យ​ក​រដ្ឋ​មន្ត្រី ហ៊ុន សែន ថ្លែងថា វត្តមានកងកម្លាំងប្រដាប់អាវុធ ឡាវ នៅក្នុងទឹកដីកម្ពុជា ក្នុងខេ​ត្ត​ស្ទឹងត្រែង ​រយៈ​ពេ​​ល​ជា​ង ៤ ខែមកហើយ នៅតែមិនព្រមដកចេញ។ លោក ថ្លែងទៀតថា ករណីនេះ លោក បានផ្ញើលិខិតជាផ្លូវការ និងហៅទូរស័ព្ទ ទៅកាន់​នា​យករដ្ឋម​ន្ត្រី​ឡា​វ ផងដែរ ប៉ុន្តែលោកថា រដ្ឋាភិបាលឡាវ មិនព្រមឆ្លើយតប។ លោក បញ្ជាក់ថាពេលនេះ លោកបា​នបញ្ជាទៅ​មេបញ្ជាកា​រកង​ពលមួយចំនួន ឲ្យត្រៀមកម្លាំង ដើម្បីចាត់វិធានការហើយ។

លោកថា៖ «អញ្ចឹងខ្ញុំសុំបញ្ជូនសារពីទីនេះ អំពាវនាវចំពោះឯកឧត្តម ថងលួន ​ស៊ីសូលីត នាយករដ្ឋមន្ត្រីនៃ​សា​ធារ​​ណ​រដ្ឋ​ប្រជាមានិត្យឡាវ ដកកងទ័ពចេញពីទឹកដីកម្ពុជា ដោយគ្មានលក្ខខណ្ឌ»។ លោកនាយករដ្ឋមន្ត្រី ហ៊ុន សែន ថ្លែងដែរថា នៅថ្ងៃនេះ បើចាំបា​ច់ លោកនឹងជិះយន្តហោះ​ ទៅ​ជួ​ប​នា​យករដ្ឋមន្ត្រីឡាវ មុនប្រើប្រាស់កម្លាំងប្រដាប់អាវុធណាមួយ ដើម្បីការពារបូរណភាពទឹកដីកម្ពុជា។​

លោកថា៖ «យើងមិនមែនប្រកាសសង្ក្រាមទេ សុំតែយកដីរបស់ខ្លួនតែប៉ុណ្ណឹងទេ ខ្ញុំមិនយកដីនរណាទាំងអស់ មួយចង្អាមក៏មិនយក តែក៏មិនឲ្យគេយកដីយើងសូម្បីតែមួយចង្អាមដែរ។ វាអត់សមហេ​តុសមផល​អីប​ន្តិ​ច​សោះ​​​​។ ហើ​យបើសិនទុកអញ្ចឹងៗៗៗ តើខ្ញុំបកស្រាយប្រាប់ពលរដ្ឋថាម៉េច»។

ក្នុង​លិខិត​ចុះ​ថ្ងៃ​ទី​២ ខែសីហា ឆ្នាំ២០១៧ រាជ​រដ្ឋា​ភិ​បាល​​កម្ពុជា ​បានស្នើ​ប្រទេស​ឡាវ ​ឲ្យ​ដក​ទ័ព​ចេញ​ពី​តំបន់​​អូរ​​ឡៃ និង​តំបន់​តាង៉ាវ ព្រំដែន​ខេត្ត​ស្ទឹង​ត្រែង និង​ខេត្ត​អាតា​ពើ​ ប្រទេស​ឡាវ ជា​បន្ទាន់​ ដោយ​ថា ​តាម​​រយៈការ​ចុះ​ត្រួត​ពិនិត្យ​ទី​តាំង​ជាក់​ស្តែង ដោយ​ប្រធាន​គណកម្មការ​ចម្រុះ​ព្រំដែន​ ប្រទេស​ទាំង​ពីរ​ឃើញ​​ថា ​ការ​បោះទី​តាំង​របស់​ទាហាន​ឡាវ​លើ​ទី​តាំង​ នៅ​អូតាង៉ាវ ស្រុងសៀង​ប៉ាង​ ខេត្តស្ទឹង​ត្រែង ​បាន​បង្ហាញ​​ថា​ទាហាន​ឡាវ បាន​រំលោភលើ​អធិបតេយ្យ​ភាព និ​ង​បូរណភាព​ទឹក​ដី​កម្ពុជាពិត​មែន។

វីអូឌី នៅមិនទាន់អាចទាក់ទង ស្ថានទូតឡាវប្រចាំកម្ពុជា ដើម្បីឆ្លើយតបនឹងបញ្ហានេះ បាននៅឡើយទេ។

អ្នកវិភាគនយោបាយលោក ឆាំ ប៊ុនថេត លើកឡើងថា បញ្ហាព្រំដែនជារឿងរសើបមួយ ដែលអ្នកនយោ​យបា​យតែងចោទគ្នាទៅវិញទៅមក ដើម្បីទាញយកប្រជាប្រិយភាព មិនថាបក្សប្រឆាំង មិនថាបក្សកាន់អំ​ណាចនោះទេ។ លោកដាក់ការសង្ស័យថា ការប្រកាសវិធានក្តៅជាមួយនឹងឡាវ ពីបញ្ហាព្រំដែននេះ លោក​វិភា​គ​ថា អាចជាការកេងចំណេ​ញ ដូចការផ្ទុះអា​វុធជាមួយថៃ​ មុខ​ការ​បោះឆ្នោតអាណត្តិទី៤ ក្នុងឆ្នាំ២០០៨។ លោកថា៖ «ហើយខ្ញុំជឿថាបញ្ហាឲ្យឡាវដកទ័ពដកអីហ្នឹងខ្ញុំជឿថា ជារឿងនយោបាយហ្នឹងឯ​ង។ ខ្ញុំគិតថា វាអា​ច​បង្ខិលកា​​រចាប់​អារម្មណ៍របស់ពលរដ្ឋ ឲ្យទៅលើករវាងខ្មែរ ហើយនិងឡាវ ដូចកាលពីយើ​ងមានបញ្ហា​​ជា​ សៀ​​ម ​នៅព្រះវិហារអីអញ្ចឹង»។

កន្លងទៅក្រសួងការបរទេសកម្ពុជា ធ្លាប់ផ្ញើកំណត់ទូតជាច្រើន ទៅប្រទេសវៀតណាម ទាក់ទិននឹងការដែ​ល​កម្ពុ​​ជា​​ចោ​ទរដ្ឋាភិបាលវៀតណាមថា បានធ្វើផ្លូវ សង់ប៉ុស្តិ៍យោធា តាមព្រំដែន ត្រង់តំបន់ហាមឃាត់ ប៉ុន្តែវៀត​ណា​​​​ម​ នៅ​តែបន្តធ្វើ ដែលរដ្ឋាភិបាលកម្ពុជា នៅមិនទា​ន់ប្រកាសពីវាធានការក្តៅ ដូចករណីជាមួ​យថ្ងៃនិង​ឡាវ​នេះទេ។

ប៉ុន្តែលោ​ក ឆាំ ប៊ុនថេត វិភាគថា បញ្ហានេះ ពលរដ្ឋទាំងអស់ គួរបន្តតាមដាន ដើម្បីចង់ដឹងថា តើបញ្ហាព្រំដែ​ននៅ​​តែអ្នកនយោបាយ យកមកធ្វើជាផលចំណេញផ្នែកនយោបាយទៀត ឬក៏យ៉ាងណា៕

Advertisements

បើកម្ពុជា អស់ពីលោក ហ៊ុន សែន ទៅ នោះប្រទេសកាន់តែមានសុខសន្តិភាព

Captureថនមុំ

នាយក​ប្រតិបត្តិ​ អង្គការ​ឃ្លាំមើល​សិទ្ធិមនុស្ស​អន្តរជាតិ Human Rights Watch លោក ប្រ៊ែដ អាដាម (Brad Adams) ថ្លែង​ថា «ប្រសិនបើ​កម្ពុជា អត់​ពីលោក ហ៊ុន សែន ទៅ​នោះ ប្រទេស​នឹង​កាន់​តែ​មាន​សុខ​សន្តិភាព ហើយ​សង្គម​ កាន់​តែ​មាន​ភាព​សុខដុមរមនា ​ក្រោម​នីតិរដ្ឋ»

(ដោយ តាំង សារ៉ាដា RFA, 11-8-2017)
ក្រុម​អ្នក​ឃ្លាំមើល​ស្ថានការណ៍​នយោបាយ​កម្ពុជា និយាយ​ថា ប្រសិន​បើ​កម្ពុជា អត់​ពី​លោក ហ៊ុន សែន ទៅ នោះ​ពលរដ្ឋ​នៃ​ប្រទេស​នេះ​កាន់​តែ​រស់​ដោយ​ភាព​សុខសាន្ត ហើយ​រដ្ឋ​សភា​ជាតិ​នឹង​ធ្វើ​ការ​ជ្រើសរើស​រដ្ឋាភិបាល​ថ្មី​បាន​ល្អ​ជាង​មុន។ ក្រុម​អ្នក​ឃ្លាំមើល​សង្គម​យល់​ឃើញ​ទៀត​ថា គ្មាន​ហេតុផល​ណា​មួយ​ដែល​នាំ​ឲ្យ​មាន​សង្គ្រាម​ផ្ទុះ​ឡើង នៅ​ពេល​គណបក្ស​ប្រឆាំង​ឈ្នះ​ឆ្នោត​នោះ​ទេ ព្រោះ​គណបក្ស​នេះ​គ្មាន​កម្លាំង​ទ័ព ហើយ​មេទ័ព​ជា​ច្រើន​ក៏​មិន​ចង់​ធ្វើ​សង្គ្រាម​សម្លាប់​ជាតិ​សាសន៍​ឯង​នោះ​ដែរ។

មេដឹកនាំ​ខ្មែរ​តែង​អួត​មិន​ដាច់​ពី​មាត់​ថា រដ្ឋាភិបាល​បច្ចុប្បន្ន ជា​រដ្ឋាភិបាល​ដែល​រក្សាសុខ​សន្តិភាព​ភាព​សុខសាន្ត និង​ការ​អភិវឌ្ឍ​ជូន​ប្រជាពលរដ្ឋ។

លោក ហ៊ុន សែន តែង​ប្រកាស​ប្រាប់​សាធារណជន​ថា មាន​តែ​រដ្ឋាភិបាល​របស់​លោក​ទេ ដែល​ខិតខំ​ប្រឹងប្រែង​ធ្វើ​ឲ្យ​ពលរដ្ឋ​នៅ​ក្នុង​ប្រទេស​ចាក​ផុត​ពី​ភាព​ក្រីក្រ ចាក់​ផុត​ពី​គ្រោះ​ទុរភិក្ស ហើយ​រស់​នៅ​ដោយ​សុវត្ថិភាព​ក្នុង​ប្រទេស។ ប៉ុន្តែ​ក្រៅ​ពី​ការ​អួត​ទាំង​នេះ លោក ហ៊ុន សែន ក៏​ពូកែ​ខាង​គំរាម​ក្នុង​ការ​ធ្វើ​សង្គ្រាម​ជាមួយ​ជន​ណា​ដែល​ហ៊ាន​ប្រជែង​អំណាច​ជាមួយ​លោក​មិន​ស្ទើរ​ដែរ សូម្បី​តែ​ប្រសិនបើ​លោក​ស្លាប់​ក៏ដោយ ក៏​លោក​អាច​បន្សល់​ភាព​ចលាចល​សង្គម​មួយ​ឲ្យ​កើត​ឡើង​បាន​ដែរ។

កាល​ពី​ថ្ងៃ​ទី​៣ ខែ​សីហា លោក ហ៊ុន សែន បាន​ថ្លែង​ចំពោះ​មុខ​ក្រុម​កីឡាករ​មុន​នឹង​ចេញ​ទៅ​ប្រកួត​កីឡា​ស៊ីហ្គេម (SEA Games) នៅ​ប្រទេស​ម៉ាឡេស៊ី (Malaysia) នៅ​ពេល​ខាង​មុន​នេះ​ថា ប្រសិនបើ​លោក​ស្លាប់​ទៅ នោះ​ស្ថានការណ៍​របស់​ប្រទេស​នឹង​ជួប​គ្រោះអាក្រក់​សម្រាប់​ប្រទេស​ជាតិ​ទៅ​វិញ​ទេ។

​លោក​គំរាម​ថា ប្រសិន​អត់​ពី​លោក​ទៅ នោះ​មន្ត្រី​នៅ​ក្នុង​ជួរ​រដ្ឋាភិបាល​ក្រោម​ការ​ដឹកនាំ​របស់​លោក​រាប់​តាំង​ពី​ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រហូត​ដល់​អនុ​រដ្ឋលេខាធិការ​ដែល​មាន​មុខងារ​នយោបាយ នឹង​ត្រូវ​រលាយ​ទៅ​តាម​លោក​ជា​ស្វ័យប្រវត្តិ​ភ្លាម​ដែរ។ លោក​ថា មាន​តែ​ក្រុម​យោធា និង​ក្រុម​នគរបាល​ទេ​ដែល​ជា​អ្នក​គ្រប់គ្រង​សភាពការណ៍៖ «នៅ​ទី​នេះ​មាន​អគ្គបញ្ជាការ ប៉ុល សារឿន អគ្គ​នគរបាល​ជាតិ នេត សាវឿន អគ្គបញ្ជាការ​រង និង​មេបញ្ជាការ​អាវុធហត្ថ​លើ​ផ្ទៃ​ប្រទេស សៅ សុខា ប៉ុន្តែ​នៅ​មាន​បណ្ដា​អង្គភាព​ដទៃ​ទៀត​ដែល​ពេល​ហ្នឹង​ជួនកាល​មាន​ការ​ញុះញង់ គឺ​វាយ​គ្រឹប​តែម្ដង ខ្មោច​មិន​អាច​ងើប​មក​ត្រួតត្រា​សភាពការណ៍​ទេ ហើយ ទៀ បាញ់ ក៏​អស់​តំណែង ស ខេង ក៏​អស់​តំណែង តើ​ទៅ​ត្រួត​ពី​ណា​ទៀត? អ៊ីចឹង​រឿង​ហ្នឹង ពេល​ខ្លះ​ត្រូវ​យល់​កុំ​ចង់​ឲ្យ ហ៊ុន សែន ងាប់ ទុក ហ៊ុន សែន ដើម្បី​នឹង​គ្រប់គ្រង»

ពាក្យ​គំរាម​របស់​លោក ហ៊ុន សែន ដែល​ជា​មេដឹកនាំ​ក្នុង​ព្រះរាជាណាចក្រ​អច្ឆរិយៈ​ទាំង​នេះ​ហើយ​បាន​ជំរុញ​ឲ្យ​មន្ត្រី​ក្រោម​ឱវាទ​របស់​លោក​មួយ​ចំនួន​នាំ​គ្នា​ហាត់​រៀន​តាម​ដូចជា​រដ្ឋមន្ត្រី​ក្រសួង​ការពារ​ជាតិ គំរាម​វ៉ៃ​ឲ្យ​បែក​ធ្មេញ និង​រដ្ឋមន្ត្រី​ការងារ លោក វង សូត គំរាម​សំពង​ក្បាល​នឹង​គល់​ឫស្សី​ចំពោះ​ជន​ណា​ដែល​ហ៊ាន​ចេញ​តវ៉ា​លទ្ធផល​ឆ្នោត​ដូច​កាល​ពី​ឆ្នាំ​២០១៣ ទៀត។

អ្នក​តាម​ដាន​ស្ថានការណ៍​នយោបាយ​ខ្លះ​និយាយ​ថា ការ​គំរាម​របស់​លោក ហ៊ុន សែន កន្លង​មក​ដូចជា​រំលាយ​របប​រាជា​និយម បិទ​ទ្វារ​វ៉ៃ​ឆ្កែ ឧបត្ថម្ភ​ក្ដារមឈូស​ចំពោះ​ជន​ណា​ដែល​ហ៊ាន​តវ៉ា​ទាមទារ​ទឹកដី​កម្ពុជា​ក្រោម និង​ការ​ផ្ទុះ​សង្គ្រាម​ឡើង​វិញ ប្រសិន​បើ​បក្ស​កាន់​អំណាច​ចាញ់​ឆ្នោត​នោះ បាន​ធ្វើ​ឲ្យ​គណបក្ស​កាន់​អំណាច​របស់​លោក​កាន់​តែ​បាត់បង់​ការ​គាំទ្រ​ពី​ប្រជាពលរដ្ឋ​ទៅ​វិញ​ហើយ​ប្រជាប្រិយភាព​របស់​បាន​ងាក​រក​គណបក្ស​ប្រឆាំង​ទៅ​វិញ។

នៅ​ក្នុង​ការ​បោះឆ្នោត​ឃុំ-​សង្កាត់ កាល​ពី​ខែ​មិថុនា កន្លង​ទៅ គណបក្ស​កាន់​អំណាច​បាន​ជ្រុះ​បាត់​តំណែង​មេ​ឃុំ និង​ចៅសង្កាត់​របស់​ខ្លួន​ចំនួន ៤៥០ ​អាសនៈ ក្នុង​ចំណោម​អាសនៈ ១.៦៤៦។ គណបក្ស​សង្គ្រោះ​ជាតិ​បាន កើន​អាសនៈ​មេ​ឃុំ និង​ចៅសង្កាត់​ពី ៤០​ ឃុំ-​សង្កាត់ ក្នុង​ឆ្នាំ​២០១២ ទៅ ៤៨៩​ ឃុំ-​សង្កាត់ ក្នុង​ឆ្នាំ​២០១៧ ដោយ​ទទួល​បាន​សំឡេង​ឆ្នោត​គាំទ្រ​ជាង ៣ ​លាន​សំឡេង​ ក្នុង​ចំណោម​អ្នក​បាន​ទៅ​បោះឆ្នោត​ជាង ៧​ លាន​នាក់។ គណបក្ស​ប្រជាជន​កម្ពុជា ទទួល​បាន​សំឡេង​ឆ្នោត​គាំទ្រ​ជាង ៣,៥ ​លាន​សំឡេង និង​គ្រប់គ្រង​តំណែង​មេ​ឃុំ-​ចៅសង្កាត់ ចំនួន ១.១៥៦ ​ឃុំ-​សង្កាត់។

អ្នក​ឃ្លាំមើល​ការ​បោះឆ្នោត​ខ្លះ​និយាយ​ថា ប្រសិនបើ​លោក ហ៊ុន សែន បើក​យុទ្ធនាការ​គំរាមកំហែង​ធ្វើ​ទុក្ខបុកម្នេញ​សង្គម​ស៊ីវិល និង​បក្ស​ប្រឆាំង​កាន់​តែ​ខ្លាំង នោះ​ប្រជាប្រិយភាព ឬ​សំឡេង​គាំទ្រ​របស់​លោក​កាន់​តែ​ចុះ​ទន់ខ្សោយ ​ត្រដរ​ខ្យល់​ក៏​កាន់​ខ្លាំង​ដែរ។ ​ម្យ៉ាង​ទៀត ការ​អួត​របស់​លោក ហ៊ុន សែន អំពី​សមិទ្ធផល សន្តិភាព និង​ការ​អភិវឌ្ឍ​កាន់តែ​គ្មាន​ន័យ ហើយ​ពលរដ្ឋ​កាន់​តែ​ចាត់​ទុក​ ពាក្យ​អួត​របស់​លោក​ គ្រាន់តែ​ពាក្យ​កុហក ​ដល់​មហាជន ក្នុង​ន័យ​បិទបាំង​ការពិត ស្ថិត​ក្រោយ​វាំងនន​ខ្មៅ​ របស់​សង្គម​មួយ​ដែល​ដឹកនាំ​ដោយ​បក្សពួក និង ​ត្រកូល​ ហ៊ុន​ របស់​លោក​ប៉ុណ្ណោះ។

នាយក​ប្រតិបត្តិ​ទទួល​បន្ទុក​កិច្ចការ​តំបន់​អាស៊ី​របស់​ អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ប្រ៊ែដ អាដាម (Brad Adams) ថ្លែង​ថា ប្រសិនបើ​កម្ពុជា អត់​លោក ហ៊ុន សែន ទៅ​នោះ ប្រទេស​នឹង​កាន់​តែ​មាន​សុខ​សន្តិភាព ហើយ​សង្គម​ កាន់​តែ​មាន​ភាព​សុខដុមរមនា ​ក្រោម​នីតិរដ្ឋ។

លោក​បន្ត​ថា ប្រសិនបើ​អស់ពី​លោក ហ៊ុន សែន ទៅ​នោះ​រដ្ឋ​សភា​ជាតិ នឹង​ជ្រើសរើស​រដ្ឋាភិបាល​ថ្មី ហើយ​រដ្ឋាភិបាល​ថ្មី​នោះ​នឹង​រៀបចំ​គណៈរដ្ឋមន្ត្រី​ថ្មី​ឡើង​វិញ។ ដូច្នេះ​គ្មាន​ហេតុ​ផល​ណា​មួយ​ដែល​នាំ​ឲ្យ​មាន​សង្គ្រាម​ផ្ទុះ​ឡើង​នោះ​ទេ៖ «សម្ភី​របស់​លោក ហ៊ុន សែន ជា​របៀប​សម្ដី​របស់​ជន​ផ្ដាច់ការ។ គេ​បញ្ចុះបញ្ចូល​ខ្លួន​គេ​ផ្ទាល់ និង​មនុស្ស​ដែល​នៅ​ក្បែរ​ខ្លួន​គេ​ថា បើ​អត់​ពី​ការ​កាន់​កាប់​អំណាច​របស់​គេ​ទៅ នោះ​ជីវិត​របស់​អ្នក​ដែល​នៅ​ជុំវិញ ពួកគេ​នឹង​មិន​អាច​រស់​រាន​មាន​ជីវិត​បាន​ទេ។ ខ្ញុំ​គិត​ថា កម្ពុជា នឹង​ក្រោក​ឡើង​ឃើញ​ផ្ទៃមេឃ​ខៀវ​ស្រឡះ​នៅ​ថ្ងៃ​បន្ទាប់​ទៅ​វិញ​ទេ ប្រសិន​លោក ហ៊ុន សែន ចុះ​ចេញ​ពី​អំណាច​ដោយ​ការ​បោះឆ្នោត ឬ​ដោយសារ​លោក​មាន​ជំងឺ​ដោយ​ប្រការ​ណា​មួយ។ ដូច្នេះ​ជីវិត​របស់​ពលរដ្ឋ​ខ្មែរ​ទូទៅ​នឹង​នៅ​តែ​បន្ត​ដដែល ប្រសិនបើ​គ្មាន​មេដឹកនាំ​ដូចជា​រូប​លោក​នោះ។ បើ​គណបក្ស​ប្រឆាំង​គ្មាន​កម្លាំង​ទ័ព​ផង​នោះ តើ​ទៅ​មាន​សង្គ្រាម​ឯ​ណា​ប្រសិនបើ​លោក ហ៊ុន សែន ស្លាប់​ទៅ​មែន​នោះ។ តាម​ពិត​ទៅ​អ្នក​ដែល​ចង់​បាន​សង្គ្រាម​កើត​ឡើង គឺ​មាន​តែ​លោក ហ៊ុន សែន ម្នាក់​ឯង​ប៉ុណ្ណោះ»

អាស៊ីសេរី នៅ​មិន​ទាន់​អាច​សុំ​ប្រតិកម្ម​ពី​មន្ត្រី​រដ្ឋាភិបាល​បាន​ទេ ប៉ុន្តែ​កន្លង​មក​រដ្ឋាភិបាល​កម្ពុជា តែង​ចាត់​ទុក​ការ​រិះគន់​របស់​លោក ប្រ៊ែដ អាដាម ថា ជា​ការ​ជ្រៀតជ្រែក​កិច្ចការ​ផ្ទៃក្នុង និង​រំលោភ​លើ​ដែន​អធិបតេយ្យ​របស់​រដ្ឋាភិបាល​ក្រុង​ភ្នំពេញ។ Read more