Monthly Archives: August 2017

UN អំពាវនាវដ្ឋាភិបាល​កម្ពុជា ត្រូវ​ធានា​សិទ្ធិ​ពលរដ្ឋ នយោបាយ និង​ សេរីភាព​សារព័ត៌មាន

Wnv87v2K

ប៉ុន្មានថ្ងៃនេះ បន្ទាប់ពីរដ្ឋាភិបាល ហ៊ុន សែន ចាត់វិធានការយ៉ាងក្រពុលមុខ និង តាមទំនើងចិត្ត បានបណ្តេញវិទ្យាស្ថានប្រជាធិបត្រយ្យ (NDI) របស់អាមេរិក និង គាបសង្កត់/បញ្ជាឲ្យផ្អាកការផ្សាយរបស់ បណ្តាញព័ត៌មានឯករាជ្យ ជាង ១០ ទៀត នោះបានធ្វើឲ្យមានប្រតិកម្មនានា ពីគ្រប់ទិសទី។ ក្នុងនោះមាន អង្គការសហប្រជាជាតិ ក្រសួងការបរទេសអាមេរិក សមាជិកសភាអាមេរិក ព្រឹទ្ធសភាអាមេរិក និងអង្គកាសសង្គមស៊ីវិល ថ្កោលទោសផង និងអំពាវនាវផង ឲ្យរដ្ឋាភិបាល ហ៊ុន សែន ត្រូវតែវិលមករកការគោរពសិទ្ធិមនុស្ស សិទ្ធិនយោបាយ និងសេរីភាពសារព័ត៌មាន។  (ដោយ នគរ.)


អង្គការ​សហប្រជាជាតិ​ ស្នើ​រដ្ឋាភិបាល​កម្ពុជា ​ធានា​សិទ្ធិ​ពលរដ្ឋ នយោបាយ និង​សេរីភាព​សារព័ត៌មាន

(RFA Khmer, ដោយ យាង សុជាមេត្តា, 25-8-2017)

ឧត្តម​ស្នងការ​អង្គការ​សហប្រជាជាតិ ទទួល​បន្ទុក​សិទ្ធិ​មនុស្ស​នៅ​ទីក្រុង​ហ្សឺណែវ (Geneva) ប្រទេស​ស្វីស (Switzerland) នៅ​ថ្ងៃ​ទី​២៥ សីហា អំពាវនាវ​ឲ្យ​រដ្ឋាភិបាល​កម្ពុជា ធានា​នូវ​សិទ្ធិ​ពលរដ្ឋ និង​នយោបាយ និង​សេរីភាព​សារព័ត៌មាន​នៅ​កម្ពុជា ក្រោយ​ពេល​រដ្ឋាភិបាល​សម្រេច​បណ្តេញ​វិទ្យាស្ថាន​ជាតិ​ប្រជាធិបតេយ្យ (NDI) ចេញ​ពី​កម្ពុជា និង​កំពុង​ធ្វើ​ទុក្ខបុកម្នេញ​ ទៅ​លើ​ប្រព័ន្ធ​ផ្សព្វផ្សាយ​មួយ​ចំនួន ​ដែល​រិះគន់​រដ្ឋាភិបាល។

ចំណែក​សមាជិក​ព្រឹទ្ធសភា​សហរដ្ឋ​អាមេរិក លោក ចន ម៉ាក់ខេន (John McCain) វិញ​ថ្លែង​ថា លោក​នាយក​រដ្ឋមន្ត្រី ហ៊ុន សែន កំពុង​ខ្លាច​សង្គម​បើក​ចំហ និង​ការ​ពិភាក្សា​ដេញដោល។

អ្នក​នាំ​ពាក្យ​ ឧត្តម​ស្នងការ​អង្គការ​សហប្រជាជាតិ ទទួល​បន្ទុក​សិទ្ធិ​មនុស្ស ថ្លែង​ថា ស្ថាប័ន​មួយ​នេះ​កំពុង​បារម្ភ​ពី​ចំណាត់ការ​របស់​រដ្ឋាភិបាល​កម្ពុជា ដែល​បាន​បញ្ឈប់​សកម្មភាព​របស់​វិទ្យាស្ថាន​ជាតិ​ប្រជាធិបតេយ្យ (NDI) និង​ការ​ធ្វើ​ទុក្ខបុកម្នេញ​ ទៅ​លើ​ប្រព័ន្ធ​ផ្សព្វផ្សាយ​មួយ​ចំនួន​ ដែល​រិះគន់​រដ្ឋាភិបាល។

សេចក្តី​ថ្លែងការណ៍​របស់​ ឧត្តម​ស្នងការ​អង្គការ​សហប្រជាជាតិ ទទួល​បន្ទុក​សិទ្ធិ​មនុស្ស បារម្ភ​ថា ការ​បិទ​ទ្វារ​វិទ្យាស្ថាន​ជាតិ​ប្រជាធិបតេយ្យ ធ្វើ​ឡើង​មិន​ទៅ​តាម​នីតិវិធី​ត្រឹមត្រូវ ហើយ​ក៏​បារម្ភ​ពី​ស្ថានភាព​កាន់​តែ​យ៉ាប់យ៉ឺន​ របស់​អ្នក​ការពារ​សិទ្ធិ​មនុស្ស និង​សង្គម​ស៊ីវិល​នៅ​កម្ពុជា។

ឧត្តម​ស្នងការ​អង្គការ​សហប្រជាជាតិ ទទួល​បន្ទុក​សិទ្ធិ​មនុស្ស អំពាវនាវ​ឲ្យ​រដ្ឋាភិបាល​ធានា​ពេញលេញ ​នូវ​ការ​គោរព​សិទ្ធិ​ពលរដ្ឋ និង​នយោបាយ ព្រម​ទាំង​សេរីភាព​សារព័ត៌មាន មុន​ពេល​ការ​បោះឆ្នោត​ជាតិ​ ឆ្នាំ​២០១៨ ចូល​មក​ដល់។

កាល​ពី​ថ្ងៃ​ទី​២២ សីហា លោក ហ៊ុន សែន បាន​ថ្លែង​ចាត់​ទុក​កាសែត ឌឹ ខេមបូឌា ដេលី (The Cambodia Daily) ថា​ជា​ចោរ ដោយសារ​តែ​មិន​បាន​បង់​ពន្ធ​ជូន​រដ្ឋ ហើយ​ថា​បើ​សិន​ជា​កាសែត​នេះ​មិន​ព្រម​បង់​ពន្ធ​ជូន​រដ្ឋ​ទេ ត្រូវ​វេច​បង្វេច​ចេញ​ពី​កម្ពុជា។ ក្នុង​ពេល​ជាមួយ​គ្នា លោក ហ៊ុន សែន ប្រកាស​ថា​នឹង​មិន​អនុញ្ញាត​ឲ្យ​មាន​ទៀត​ឡើយ​បន្ទប់​ស្ថានការណ៍​សម្រាប់​ការ​បោះឆ្នោត បង្កើត​ឡើង​ដោយ​បណ្ដុំ​អង្គការ​ក្រៅ​រដ្ឋាភិបាល។ លោក ហ៊ុន សែន ថែម​ទាំង​ស្ដីបន្ទោស​អ្នក​ដែល​ផ្តល់​លុយ​ជួយ​បន្ទប់​ស្ថានការណ៍​ទៀត​ផង។

មួយ​ថ្ងៃ​ក្រោយ​ការ​ព្រមាន​របស់​លោក ហ៊ុន សែន នេះ ក្រសួង​ការ​បរទេស​កម្ពុជា បាន​ចេញ​លិខិត​បញ្ឈប់​សកម្មភាព​របស់​វិទ្យាស្ថាន​ជាតិ​ប្រជាធិបតេយ្យ (NDI) ហើយ​ជា​បន្ត​បន្ទាប់​មក​ទៀត វិទ្យុ​ក្នុង​ស្រុក​ដែល​ចាក់​ផ្សាយ​កម្មវិធី​វិទ្យុ​ របស់​បក្ស​ប្រឆាំង អាស៊ីសេរី (RFA) និង​វីអូអេ (VOA) ភាគច្រើន​ត្រូវ​បាន​ក្រសួង​ព័ត៌មាន បញ្ឈប់​សកម្មភាព​អាជីវកម្ម​តែ​ម្តង ចំណែក​ខ្លះ​ទៀត​បញ្ឈប់​ការ​ផ្សាយ​បន្ត​កម្មវិធី​ពី​វិទ្យុ​បរទេស​ទាំងនេះ ដោយ​ក្រសួង​អះអាង​ថា វិទ្យុ​ទាំងអស់​នេះ​ បាន​រំលោភ​ប្រកាស​អនុញ្ញាត និង​កិច្ចសន្យា​ជាមួយ​ក្រសួង។

ក្រៅ​ពី​នេះ វិទ្យុ​សំឡេង​ប្រជាធិបតេយ្យ វីអូឌី (VOD) របស់​មជ្ឈមណ្ឌល​កម្ពុជា ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) ដែល​ផ្សាយ​តាម​រយៈ​វិទ្យុ អេហ្វ.អឹម (FM) ក្នុង​រាជធានី​ភ្នំពេញ និង​នៅ​តាម​ខេត្ត​មួយ​ចំនួន ត្រូវ​បាន​ផ្អាក​ទាំងស្រុង ​នៅ​ថ្ងៃ​ទី ​២៤ សីហា។ CCIM ជឿជាក់​ថា សកម្មភាព​របស់​រដ្ឋាភិបាល​ ក្នុង​ការ​បិទ​ប្រព័ន្ធ​ផ្សព្វផ្សាយ​ឯករាជ្យ ​នៅ​ប្រទេស​កម្ពុជា គឺ​ជា​ចេតនា​នយោបាយ ឈាន​ឆ្ពោះ​ទៅ​រក​ ការ​បោះឆ្នោត​ជ្រើស​តាំង​តំណាងរាស្ត្រ ដែល​នឹង​ប្រព្រឹត្ត​ទៅ ​នៅ​ខែ​កក្កដា ឆ្នាំ​២០១៨ ខាង​មុខ។ Read more

Advertisements

ព្រឹទ្ធសមាជិកអាមេរិក John McCain ថ្លែងថា ហ៊ុន សែន ប្រើយុទ្ធសាស្ដ្រ ផ្ដាច់ការ បំបិទសម្លេងប្រឆាំង មុនការបោះឆ្នោតជាតិ

Phot345345frgeso_Template_872x562

សមាជិកព្រឹទ្ធសភាអាមេរិក John McCain ថ្លែងថា ហ៊ុន សែន ប្រើយុទ្ធសាស្ដ្រ ផ្ដាច់ការ បំបិទសម្លេងប្រឆាំង មុនការបោះឆ្នោតជាតិ ឆ្នាំ២០១៨ ចំពេលរដ្ឋាភិបាល ហ៊ុន សែន ប្រើលេសនានា ចាត់វិធានការយ៉ាងក្រពុលមុខ លើអង្គការសង្គមស៊ីវិល និងបណ្តាញផ្សព្វផ្សាយឯករាជ្យ នៅប៉ុន្មាថ្ងៃនេះ។


សមាជិកព្រឹទ្ធសភាអាមេរិក៖ លោក ហ៊ុន សែន នឹងប្រើយុទ្ធសាស្ដ្រ ផ្ដាច់ការបំបិទសំឡេងប្រឆាំង

(VOD, ដោយ ពេជ្រ ចំរុង, 25-8-2017)

សមាជិកព្រឹទ្ធិសភា ដ៏មានឥទ្ធិពលម្នាក់ នៅសហរដ្ឋអាមេរិក រិះគន់ថា លោកនាយករដ្ឋមន្ដ្រី ហ៊ុន សែន កំពុងភ័យខ្លាចការបោះឆ្នោតថ្នាក់ជាតិ នាពេលខាងមុខ ដោយថា លោកនឹងប្រើមធ្យោបាយបែបផ្ដាច់ការ ដើម្បីបំបិទសំឡេងប្រឆាំង។ ប្រតិកម្មនេះ ធ្វើឡើងបន្ទាប់ពីរដ្ឋាភិបាលកម្ពុជា កាលពីថ្ងៃទី២៣ សីហា បានសម្រេចបិទអង្គការអាមេរិកមួយឈ្មោះ «វិទ្យាស្ថានជាតិប្រជាធិបតេយ្យ» ឬ «NDI» ដោយចោទអង្គការនេះថា មិនបានចុះបញ្ជីត្រឹមត្រូវ និងខកខានកាតព្វកិច្ចបង់ពន្ធ។

ក្នុងសេចក្ដីថ្លែងការណ៍ ចេញផ្សាយនៅថ្ងៃទី២៤ សីហា ម្សិលមិញ ព្រឹទ្ធិសភាសហរដ្ឋអាមេរិក និងជាប្រធានគណៈកម្មការសេវាកងទ័ពនៃព្រឹទ្ធសភា លោក John McCain បានបង្ហាញក្ដីបារម្ភអំពីការគោរពសិទ្ធិមនុស្ស និងលទ្ធិប្រជាធិបតេយ្យ ក្នុងប្រទេសកម្ពុជា បន្ទាប់ពីរដ្ឋាភិបាលលោក ហ៊ុន សែន បានបណ្ដេញបុគ្គលិកអង្គការ NDI ចេញពីប្រទេស។

លោក John McCain យល់ថា លោក ហ៊ុន សែន កំពុងព្យាយាមបំបិទសំឡេងភាគី នៃលទ្ធិប្រជាធិបតេយ្យ ធ្វើបាបក្រុមអង្គការសង្គមស៊ីវិល និងរិតត្បិតសិទ្ធិសេរីភាពសារព័ត៌មាន នៅមុនការបោះឆ្នោតថ្នាក់ជាតិ នាឆ្នាំក្រោយ។ លោកថា៖ «នេះគឺជាសកម្មភាពចុងក្រោយបង្អស់ ក្នុងយុទ្ធនាការរបស់រដ្ឋាភិបាល ដើម្បីបំបិទសំឡេងភាគី នៃលទ្ធិប្រជាធិបតេយ្យ យីយាដល់ក្រុមសង្គមស៊ីវិល និងរឹតបន្តឹងប្រព័ន្ធផ្សព្វផ្សាយ ដើម្បីរារាំងដល់ដំណើរការបោះឆ្នោតជាតិដោយចំហ និងសេរីនៅឆ្នាំក្រោយ។ តាមរយៈការបណ្តេញបុគ្គលិកអង្គការ  NDI នាយករដ្ឋមន្រ្តីកម្ពុជា លោក ហ៊ុន សែន គឺកំពុងបង្ហាញថា គាត់ភ័យខ្លាចសង្គមមួយ ដែលមានការបើកចំហ និងការពិភាក្សាដេញដោល។ ហើយថា លោក ហ៊ុន សែន នឹងហ៊ានប្រើយុទ្ធសាស្ដ្របែបផ្ដាច់ការ ដើម្បីគាបសង្កត់ពួកគេ»។

លោកអះអាងថា NDI ជាអង្គការដ៏សំខាន់មួយ ដែលធ្វើការផ្នែកលទ្ធិប្រជាធិបតេយ្យ និងពង្រឹងនីតិរដ្ឋ នៅលើពិភពលោក ដោយថា អង្គការមនុស្សធម៌មួយនេះ បានជួយធានានូវសុចរិតភាពនៃដំណើរបោះឆ្នោត នៅប្រទេសកម្ពុជាផងដែរ។

នៅថ្ងៃតែមួយនៃការបិទអង្គការ NDI ស្ថានទូតអាមេរិកប្រចាំកម្ពុជា និងក្រសួងការបរទេសអាមេរិក បានលើកឡើងនូវក្ដីបារម្ភ ជុំវិញបញ្ហាប្រជាធិបតេយ្យដ៏ក្មេងខ្ចីរបស់កម្ពុជា ដោយពួកគេចោទសួរថា «តើប្រទេសកម្ពុជាមានការប្តេជ្ញាចិត្ត ចំពោះលទ្ធិប្រជាធិបតេយ្យ ដែរឬទេ?» និងថា ប្រជាធិបតេយ្យដើរទៅមុខ ឬថយក្រោយ គឺកម្ពុជាខ្លួនឯង ជាអ្នកសម្រេច។

ទូតអាមេរិកប្រចាំកម្ពុជាថា អង្គការ NDI មានអនុស្សារណៈយោគយល់ត្រឹមត្រូវ​ និងថា អង្គការនេះ បានដាក់ពាក្យស្នើសុំចុះបញ្ជីជាមួយក្រសួងការបរទេសកម្ពុជា កាលពីថ្ងៃទី២១ កញ្ញា ឆ្នាំ២០១៦ ប៉ុន្ដែមិនទាន់ទទួលបានការឆ្លើយតប ពីក្រសួងការបរទេសខ្មែរឡើយ មកទល់ពេលនេះ។

អ្នកនាំពាក្យក្រសួងការបរទេសកម្ពុជា លោក ជុំ សន្ទរី មិនអាចទាក់ទងបានទេ ចាប់ពីថ្ងៃប្រកាសបិទអង្គការ NDI មក។

អ្នកនាំពាក្យគណបក្សប្រជាជន លោក សុខ ឥសាន លើកឡើងថា ការបិទអង្គការ NDI និងការហាមឃាត់ប្រព័ន្ធផ្សព្វផ្សាយ កាលពីពេលថ្មីៗនេះ គឺដោយសារពួកគេមានទំនោរទៅរកគណបក្សប្រឆាំង និងថា បានរំលោភច្បាប់នៃព្រះរាជាណាចក្រកម្ពុជា។ លោកថា នេះជាការអនុវត្តច្បាប់ ក្នុងសង្គមប្រជាធិបតេយ្យ។ លោកថា៖ «គាត់ថា យើងរដ្ឋាភិបាលអ្នកបំបាត់សំឡេងខាងប្រឆាំង អញ្ចឹងបានសេចក្ដីថា អាអង្គការ NDI IRI ស្អីហ្នឹង អាហ្នឹងសុទ្ធតែខាងប្រឆាំងហើយ អាហ្នឹងមិនខុសទេ ការបិទហ្នឹង ពីព្រោះអ្នកឯងលម្អៀងខាងនយោបាយ មិនគោរពលក្ខន្ដិករបស់ខ្លួន ដែលតម្កល់នៅក្រសួងការបរទេស ហើយនៅក្រសួងមហាផ្ទៃ ដល់អញ្ចឹងឲ្យធ្វើការម៉េចកើត មានយុត្តិធម៌សង្គមមកពីណា ហើយប្រព័ន្ធផ្សព្វផ្សាយមួយចំនួនហ្នឹង ក៏លម្អៀងខាងនយោបាយដែរ ហើយមិនគោរពច្បាប់ទៅទៀត ថាតើឲ្យយើងអនុវត្តនីតិរដ្ឋ លទ្ធិប្រជាធិបតេយ្យម៉េចកើត»។

អ្នកវិភាគនយោបាយ លោកបណ្ឌិត ឡៅ ម៉ុងហៃ យល់ថា កម្ពុជាហាក់កំពុងយកគំរូតាមប្រទេសរុស្ស៊ី ដែលចោទអាមេរិកថា បានបង្កើតចលនាបដិវត្តន៍ពណ៌ ផ្ដួលរំលំរដ្ឋាភិបាល។ លោកថា គំរូនេះ ស្ដែងឡើងតាមរយៈការបិទអង្គការ NDI របស់អាមេរិក ការរិតត្បិតក្រុមអង្គការសង្គមស៊ីវិល និងបណ្ដាញសារព័ត៌មាន ដោយថា ដើម្បីឲ្យបក្សកាន់អំណាច អាចយកឈ្នះការបោះឆ្នោតនាពេលខាងមុខ។

លោកថា៖ «គឺរបៀបអញ្ចឹង ហើយក៏ប្រហែលជាមានឥទ្ធិពលមកលើរបបគ្របគ្រង់ក្នុងប្រទេសកម្ពុជា […] វិធានការសព្វថ្ងៃ ដូចជា NDI គឺក្នុងក្របខណ្ឌ គោលនយោបាយដែលប្រឆាំង ឬបដិវត្ដន៍ពណ៌ ការផ្លាស់ប្ដូររបប ដែលគេយល់ថា អង្គការទាំងនោះ ជួយឲ្យមានបដិវត្ដន៍ពណ៌។ ហើយខាងប្រព័ន្ធផ្សព្វផ្សាយក៏អញ្ចឹងដែរ វានៅក្នុងក្របខណ្ឌហ្នឹង ដើម្បីកាត់បន្ថយហានិភ័យក្នុងការផ្លាស់ប្ដូររបប»។

នៅថ្ងៃសុក្រនេះដែរ អង្គការឃ្លាំមើលសិទ្ធិមនុស្សអន្ដរជាតិ (Human Rights Watch) បានចេញថ្លែងការណ៍រិះគន់រដ្ឋាភិបាលកម្ពុជា ដោយថា លោក ហ៊ុន សែន គួរបញ្ឈប់សកម្មភាពគំរាមកំហែងទាំងនេះ ដោយថា បើពុំដូច្នោះទេ លទ្ធផលបោះឆ្នោតឆ្នាំ២០១៨ នឹងពុំអាចជឿទុកចិត្តបានឡើយ។

ទំនាក់ទំនងកម្ពុជា-អាមេរិក កាន់តែមានភាពរង្គោះរង្គើខ្លាំងឡើងៗ ដោយប្រតិកម្មរបស់សហរដ្ឋអាមេរិក ជុំវិញការបិទអង្គការ NDI ត្រូវបានមន្ដ្រីរដ្ឋាភិបាលចោទថា ជាការញុះញង់ និងព្រមានធ្វើបាតុកម្មតវ៉ា នៅមុខស្ថានទូតអាមេរិកប្រចាំនៅកម្ពុជាទៀតផង។

ការបិទអង្គការ NDI ធ្វើឡើងបន្ទាប់ពីអង្គភាពសារព័ត៌មាន ដែលគេថា ស្និទ្ធនឹងរដ្ឋាភិបាល បានចុះផ្សាយ ដោយថា អង្គការ NDI បានជួយរៀបចំនិងជ្រោមជ្រែងឲ្យគណបក្សប្រឆាំង ផ្ដួលរំលំរដ្ឋាភិបាល ក្នុងការបោះឆ្នោតជាតិនៅឆ្នាំ២០១៨ ខាងមុខ៕

កូនប្រុសទាំង ៣ របស់ ហ៊ុន សែន ក្នុងគំរោងបាតុកម្មប្រឆាំង ស្ថានទូតអាមេរិក នៅកម្ពុជា

21077459_1364308833690259_5035972592566499255_n

ព័ត៌មានធ្វើបាតុកម្មប្រឆាំងស្ថានទូតអាមេរិក នៅក្រុងភ្នំពេញ ត្រូវបានចែកចាយសំបូរបែប កាលពីម្សិលមិញ។ ប្រភពដំណឹងនេះ បានចុះផ្សាយជាដំបូងដោយ កាសែត Fresh News ដែលជិតស្និទ្ធនឹងរដ្ឋាភិបាល ហ៊ុន សែន។ ហើយនៅថ្ងៃនេះ កាសែត The Cambodia Daily ចុះផ្សាយអំពីដំណឹងនេះដែរ។ គំរោងផែនការធ្វើបាតុកម្មនេះ កើតឡើងបន្ធាប់ពី ក្រសួងការបរទេសអាមេរិក ថ្កោលទោសរដ្ឋាភិបាល ហ៊ុន សែន ថ្ងៃទី២៤ ខែសីហា ឆ្នាំ២០១៧ ដែលបណ្តេញ វិទ្យាស្ថានប្រជាធិបតេយ្យ NDI និងដាក់ការគាបសង្កត់កាសែត The Cambodia Daily អំពីរឿងបង់ពន្ធដារ ១០ ឆ្នាំ ហើយនិងវិទ្យុ VOA និងវិទ្យុ RFA ក៏ត្រូវរងការគំរាមកំហែង។

ក្រុមការងាររៀបចំបាតុកម្ម ដែលគេស្គាល់ ជាក្រុមការងារមុខសញ្ញាចាស់ ដែលធ្លាប់រៀបចំបាតុកម្ម ប្រឆាំងមេដឹកនាំបក្សប្រឆាំង លោក កឹម សុខា ហើយនិងធ្លាប់បញ្ជាក្រុមអង្គរក្សនាយករដ្ឋមន្រ្តី ហ៊ុន សែន ឲ្យព្រួតវាយតំំណាងរាស្រ្តបក្សប្រឆាំង ២ រូប គឺលោក ញ៉ាយ ចំរើន និងលោក គង់ សុភា កាលពីខែតុលា ឆ្នាំ២០១៥។ ក្រុមមុខសញ្ញាចាស់នេះ មានមេដឹកនាំយុទ្ធសាស្រ្តរបស់គេ ដឹកនាំដោយលោក ហ៊ុន ម៉ាណែត, លោក ហ៊ុន ម៉ានិត និងលោក ហ៊ុន ម៉ានី ដែលជាកូនប្រុសទាំង ៣ របស់លោក ហ៊ុន សែន។ ពួកគេ មិនទាន់ផ្សព្វផ្សាយអំពីផែនការជាក់លាក់ ក្នុងការធ្វើបាតុកម្មប្រឆាំង ទូតអាមេរិក នៅឡើយទេ

មជ្ឈដ្ឋានជាតិ និងអន្តរជាតិ កំពុងព្រួយបារម្ភ អំពីស្ថានភាពនយោបាយ នៅកម្ពុជា ខណៈពេលដំណើរការបោះឆ្នោតជាតិ ខែកក្កដា ឆ្នាំ២០១៨ កាន់តែរំកិលជិតមកដល់។ ផ្ទុយទៅវិញ រដ្ឋាភិបាល ហ៊ុន​ សែន មិនខំធ្វើឲ្យស្ថានភាពសង្គមល្អប្រសើរ តែបែរជាខំបង្កភាពអាប់អួរដល់សង្គម និង បង្កការគំរាមកំហែង ស្ថាប័នផ្សព្វឯករាជ្យ ព្រមទាំងអង្គការសង្គមស៊ីវិល របស់សហរដ្ឋអាមេរិកផង៕ (អត្ថបទដោយ ម៉ែន ណាត /ថ្ងៃទី២៥ សីហា ២០១៧)

21034578_1364300177024458_1213295389552341663_nWP-LastImage-49-800x533-800x533