កន្លងមក ក្រុមអ្នកជំនាញការព្រំដែនខ្មែរ នៅប្រទេសបារាំង និង ក្រុមប្រឹក្សាឃ្លំាមើលកម្ពុជា បានប្រឆាំងជំទាស់ដាច់អហង្កា ចំពោះរដ្ឋាភិបាល ហ៊ុន សែន និង រដ្ឋសភា ជាដើមផង បានផ្តល់សច្ចាប័ន លើសន្ធិសញ្ញាព្រំដែនបំពេញបន្ថែមថ្មី ឆ្នាំ២០០៥ ទៅលើសន្ធិសញ្ញាព្រំដែនខុសច្បាប់ ឆ្នាំ១៩៨៥ ព្រំទាំងផែនទីអម «បោះពុម្ពនៅវៀតណាម» នៃសន្ធិសញ្ញានោះផង។ ក្រុមការងារពិគ្រោះយោបល់កិច្ចការព្រំដែន នៅតែរក្សាជំហរ ជំទាស់ការបោះបង្គោលព្រំដែនថ្មី ពីព្រោះថា វាធ្វើឲ្យកម្ពុជាខាតបង់ទឹកដីខ្មែរ ខាតបង់ព្រំដែនគោក ចន្លោះពី ៤០០០ គ.ម.ក្រឡា ទៅ ៦០០០ គ.ម.ក្រឡា (ឯកសារព្រំដែនខ្មែរ ស៊ាន ប៉េងសែ)។
ជាក់ស្តែងភូមិកំណើត លោក ហេង សំរិន នៅភូមិថ្លុកត្រាច ឃុំកក់ ស្រុកពញាក្រែក ត្បូងឃ្មុំ ជាឧទាហរណ៍ច្បាស់លាស់មួយ ត្រូវរអិលចូល ទៅក្នុងទឹកដី វៀតណាម បន្ទាប់ពីរដ្ឋាភិបាល ហ៊ុន សែន អនុវត្តសន្ធិសញ្ញាព្រំដែនថ្មី ឆ្នាំ២០០៥ និង ផែនទីអមផងនោះ ដើម្បីបោះបង្គោលព្រំដែនថ្មី ដែលមកដល់ពេលនេះ ការបោះបង្គោល សម្រេចបាន ៨៤% ហើយ។ ឯកសារសន្ធិសញ្ញានេះ និងផែនទីអម វាមិនទាន់តឹមត្រូវ ទៅតាមការចង់បានរបស់អ្នកជំនាញការព្រំដែនខ្មែរ ក្រៅប្រទេស និងពីគ្រប់ភាគីនៅឡើយទេ។ ឯកសារទាំងនេះ រដ្ឋាភិបាល ហ៊ុន សែន ធ្វើឡើងទៅតាមការចង់បាន របស់វៀតណាម តែប៉ុណ្ណោះ។ វាផ្ទុយនឹងមាត្រា២ និងមាត្រា៥៥ នៃរដ្ឋធម្មនុញ្ញ ។ ម្ល៉ោះហើយពលរដ្ឋខ្មែរ តាមព្រំដែនខ្មែរ-យួន បានយំស្រែកគ្រប់ទីកន្លែង អំពីការបាត់បង់ ដីស្រែចំការរបស់ខ្លួន ទៅខាងភាគីវៀតណាម។
ក្រុមប្រឹក្សាឃ្លាំមើលកម្ពុជាសូមចាត់ទុកថា ជាអំពើក្បត់ជាតិ ករណីរដ្ឋាភិបាល ហ៊ុន សែន ធ្វើឲ្យបាត់បង់ទឹកដីខ្មែរ ក្រោយពេលអនុវត្តសន្ធិសញ្ញាព្រំដែនថ្មី និង ការបោះបង្គោលព្រំដែនថ្មី មកទល់សព្វថ្ងៃ។
ក្រុមការងារយើង នៅតែរក្សាជំហរទាមទារ ការដោះស្រាយបញ្ហាព្រំខ្មែរ ជាមួយវៀតណាម តាមរយៈរដ្ឋសភាខ្មែរ ត្រូវលុបចោលសន្ធិសញ្ញាព្រំដែនថ្មី ឆ្នាំ២០០៥ និង ឯកសារព្រំដែនពាក់ព័ន្ធដទៃទៀត ត្រូវដាក់ជាមោឃភាពជាបន្ទាន់។ ហើយរឿងនៅសេសសល់គឺ រដ្ឋាភិបាលខ្មែរ ត្រូវប្តឹងទៅប្រទេសម្ចាស់ហត្ថលេខី នៃកិច្ចព្រមព្រៀងទីក្រុងប៉ារីស ១៩៩១ និង ប្តឹងទៅតុលាការអន្តរជាតិ ទីក្រុងឡាអេ ដើម្បីទាមទារមកវិញ នូវទឹកដីដែលបាត់បង់ និង បូរណភាពទឹកដីខ្មែរពេញលេញ។
ធ្វើនៅក្រុងគ្រីសស្ទានសាន់ (ប្រទេសន័រវេស៍) ថ្ងៃទី២១ ខែសីហា ២០១៧
ម៉ែន ណាត, ក្រុមប្រឹក្សាឃ្លាំមើលកម្ពុជា
អ្នកនាំពាក្យរដ្ឋសភា ឲ្យសួររាជរដ្ឋាភិបាល រឿងសុខ ទូច ថាហេង សំរិន យកដីយួននៅ
(Angrut News, 21-8-2017)
ភ្នំពេញ៖ ជុំវិញករណី លោក សុខ ទូច ប្រធានរាជបណ្ឌិត្យសភាកម្ពុជា ដែលបានលើកឡើងថា «ភូមិគ្រឹះសម្តេច ហេង សំរិន ប្រធានរដ្ឋសភា នៅខេត្តត្បូងឃ្មុំ ស្ថិតនៅលើទឹកដីវៀតណាម» នោះ លោក ឡេង ប៉េងឡុង អ្នកនាំពាក្យរដ្ឋសភា មិនបកស្រាយឲ្យបានវែងឆ្ងាយ ដោយជំរុញឲ្យ អ្នកសារព័ត៌មាន ទៅសាកសួររាជរដ្ឋាភិបាល ឬក៏គណៈកម្មាធិការព្រំដែន បើចង់បានច្បាស់លាស់ជាងនេះ ។
ថ្លែងប្រាប់ក្រុមអ្នកសារព័ត៌មាន ក្រោយបញ្ចប់កិច្ចប្រជុំ គណៈកម្មាធិការអចិន្ត្រៃយ៍ រដ្ឋសភា នៅព្រឹកថ្ងៃទី២១ សីហា ២០១៧ នេះ លោក ឡេង ប៉េងឡុង មិនបានធ្វើការអត្ថាធិប្បាយច្រើននោះទេ គ្រាន់តែ លោកថា ដើម្បីកំណត់ព្រំដែន រវាងកម្ពុជា និង វៀតណាម ត្រូវធ្វើឡើងតាមកិច្ចព្រមព្រៀង រវាងប្រទេសទាំងពីរ។
លោក ឡេង ប៉េងឡុង បញ្ជាក់ថា «បញ្ហាទាំងអស់នេះ មិនមែននិយាយមួយម៉ាត់ ដើម្បីស្រួលយល់នោះទេ ចឹងចង់ដឹងច្បាស់ សួរគណៈកម្មាធិការព្រំដែន និងរាជរដ្ឋាភិបាល ដែលកំណត់យ៉ាងម៉េច? ខ្ញុំមិនអាចមិនមានសមត្ថកិច្ច បកស្រាយជូននោះទេ» ។
សូមបញ្ជាក់ថា នៅក្នុងសន្និសីទកាសែត ស្តីពីបញ្ហាព្រំដែន នៅរាជបណ្ឌិត្យសភាកម្ពុជា នាព្រឹកថ្ងៃទី១៨ ខែសីហា ឆ្នាំ២០១៧ លោក សុខ ទូច បានលើកឡើងថា «ភូមិគ្រឹះសម្តេច ហេង សំរិន ប្រធានរដ្ឋសភា ដែលនៅខេត្តត្បូងឃ្មុំសព្វថ្ងៃនេះ ចំលើដីវៀតណាម ប៉ុន្តែសម្តេច បានរស់នៅតាំងពីយូរមកហើយ» ។ លោកថា «សម្ដេច ហេង សំរិន ទេ ដែលយកដីវៀតណាមនៅ ពីព្រោះទំលាក់ផែនទីទៅ ដីលោកតា ហេង សំរិន ឬសម្ដេច ហេង សំរិន បានទៅលើវៀតណាម ប៉ុន្ដែគាត់ រស់នៅយូរហើយ អ៊ីចឹងឥឡាវចង់យករូបមន្ដ ដូចខ្មែរ ទៅនៅនឹងយូរដែរ» ៕
CWCI Cambodia 